கரிக்குருவி: கோனாட்டு சோழர் எனும் கொங்கு சோழர்

அறிமுகம் :-

கி.பி.930 – யில் தொடங்கி கி.பி.1305 வரை கிட்டத்தட்ட 375 ஆண்டுகள் தொடர்ந்து கொங்குநாட்டை சுயாட்சியாக தஞ்சை சோழர்களுக்கு கீழ்படியாமல் ஆட்சி செய்தவர்களே இந்த கொங்கு சோழர்கள். அவர்களை பற்றிய ஆய்வே இந்த கட்டுரை.

கொங்கு சோழர்கள் யார் :-

நாம் அனைவரும் சோழர்கள் என்று கேள்விப்பட்டிருப்போம், பாடபுத்தகத்தில் படித்திருப்போம். அதுமட்டுமில்லாமல் சோழர்கள் என்றாலே நமக்கு நினைவுக்கு வருவது தஞ்சை சோழர்கள் மட்டுமே. ஆனால் இந்த கொங்கு சோழர்களைப் பற்றி இதுவரை கேள்விப்பட்டிருக்க மாட்டோம். இவ்வாறு இருக்கும் போது கொங்கு சோழர்களை பற்றி ஆராய்ச்சி செய்து முனைவர் பட்டம் பெற்ற Dr.புவனேஸ்வரி எழுதிய ”கொங்குசோழர்” என்னும் புத்தகத்தை எதர்ச்சையாக படிக்க நேர்ந்தது. அந்த புத்தகத்தை படித்தவுடன் இவர்களைப்பற்றி இன்னும் ஆழமான ஆய்வு தேவை என்றும் அத்துடன் அவ்வளவு சிறப்புடன் 700 ஆண்டுகளுக்கு முன்பு வரை ஆட்சி செய்த அரச பரம்பரை யார்? அவர்கள் எப்படி இருப்பார்கள்? என்ற ஆசை என்னுள் மேலோங்கியது. அந்த எண்ணத்தில் விளைந்ததே இந்த கட்டுரை.

கொடும்பாளூர் இருக்கு வேளிர்:-

Dr.புவனேஸ்வரி அவர்கள் எழுதிய கொங்கு சோழர் புத்தகத்திலும் சரி அவர்கள் செய்த PHD ஆய்விலும் சரி கொடும்பாளூர் இருக்குவேளிர்தான் இந்த கொங்கு சோழர்கள் என்று சந்தேகத்திற்கு இடமின்றி நிருபித்துள்ளார். ஆகையால் நாம் அதை ஆராய வேண்டியதில்லை.

ஆனால் முனைவர் புவனேஸ்வரி இந்த வேளிர்கள் தற்போது என்ன பெயரில், எவ்வாறு, எங்கு இருக்கிறார்கள் என்று ஒரு இடத்தில்கூட அவர்கள் எந்த சிறு குறிப்புகூட தரவில்லை. இந்த எண்ணம் எனக்கு தோன்ற காரணம் அவர்கள் இதை வேண்டுமென்றே மறைத்துள்ளார்கள் என்று அவர் புத்தகத்தை உன்னிப்பாக படிக்கும்போது நமக்கு தெரியும். அதன் காரணத்தை ஆராய்வதை விடுத்து கொங்கு சோழர்கள் யார் என்று அறியவேண்டும் என்ற எண்ணம் மட்டுமே எனக்குள் இருந்தது. ஆகையால் இதையே என் முதல் ஆய்வாக எடுத்துக்கொண்டேன்.

அப்பொழுது வேளிர் என்றால் என்னவென்று பல வரலாற்று ஆய்வாளர்கள் எழுதிய கருத்துக்களை தேடிப்படிக்க படிக்க எனக்கு ஒரு விசயம் தெளிவானது. அதாவது இன்றைய காலகட்டங்களில் வெள்ளாளர்கள் என்று அழைக்கபட்டவர்களே அன்று வேளிர்கள் என்று அழைக்கப்பட்டார்கள் என்பது திண்ணம். இதை எந்த வரலாற்று ஆசிரியர்களும் மறுக்கமுடியாத அளவுக்கு பல ஆதாரங்கள் நம் வரலாற்றில் கொட்டிக்கிடக்கிறது. எனது சந்தேகம் முழுவதும் முதலில் சோழிய வெள்ளாளர்கள் மேல் இருந்தது. ஆனால் சோழிய வெள்ளாளருக்கு கொங்குநாட்டில் எந்த செல்வாக்கும் இல்லை இங்கு மிகுந்த செல்வாக்கு பெற்றவர்கள் கொங்குவெள்ளாளர்களே ஆனால் எதுவாக இருந்தாலும் எனக்கு வெள்ளாளர்கள் பற்றி அதிகம் தெரியவில்லை.

கொங்கு வெள்ளாளர்:-

வெள்ளாளர்களை பற்றி எதுவும் தெரியாத காரணத்தினால் முதலில் கொங்கு வெள்ளாளர்களை பற்றி படிக்க தொடங்கினேன். அப்பொழுதுதான் எனக்கு குலம், கோத்திரம் பற்றி ஒரு தெளிவு கிடைத்தது. அதன் பிறகே எனது தேடலில் ஒரு திருப்பம் ஏற்பட்டது. அதாவது பொதுவாக ”கோத்திரம்” என்று சொல்லுவதைத்தான் வெள்ளாளர்கள் ”கூட்டம்” என்று சொல்லுகிறார்கள். அதாவது ”கோத்திரம்” என்றால் தமிழில் ”கூட்டம்” என்று பொருள். அதன் பிறகு அவர்களின் கூட்டங்களை பற்றி படிக்க தொடங்கினேன். அதற்கு புலவர்.இராசு ஐயாவின் புத்தகங்கள் எனக்கு உதவியாக இருந்தது. அவரின் புத்தகத்தில் இருந்த ஒவ்வொரு கூட்ட பெயர்களையும் மிக உன்னிப்பாக படித்துக்கொண்டு இருந்தேன். அப்பொழுது அந்த பட்டியலில் “சோழர்” என்ற கூட்டபெயர் இருந்தது. அதை படித்தவுடன் அந்த கூட்டத்தின் வரலாற்றை தேடினேன் ஆனால், அந்த கூட்டத்தை பற்றி எந்த வரலாறும் இல்லை. என்ன செய்வது என்று புரியாமல் இருந்த போதுதான் ஒரு புத்தக வெளியீட்டு விழாவில் புலவர்.இராசு ஐயாவை சந்திக்க நேர்ந்தது.

அப்பொழுது அவர் புத்தகத்தில் குறிப்பிட்டு இருந்த “சோழர்” என்னும் கூட்டத்தை சுட்டிக்காட்டி அதுபற்றி வினவினேன். அவர் அதை வாங்கி பார்த்துவிட்டு இந்த கூட்டபெயர் ஒரே ஒரு கல்வெட்டில் மட்டுமே கிடைக்கிறது நடைமுறையில் அந்த பெயர் இல்லை என்று கூறிவிட்டார். அத்துடன் அந்த கல்வெட்டு நம்பியூரில் கிடைக்கிறது என்று கூறினார். அதன் பிறகு அந்த கல்வெட்டை மத்திய தொல்லியல் துறையின் புத்தகத்தில் தேடி கண்டுபிடித்தேன்.

அந்த கல்வெட்டு வீரபாண்டியன் ஆட்சியாண்டில் பொறிக்கப்பட்டது. அந்த கல்வெட்டு பொறிக்கப்பட்ட ஆண்டில் கொங்கு சோழன் ஒருவன் ஆட்சியில் இருந்தான் என்றும் அவன் பெயர் தெரியவில்லை என்றும் தொல்லியல் துறையின் அறிக்கையில் இருந்தது.

அந்த கல்வெட்டில் பொறிக்கப்பட்ட “சோழரில்” என்பது கூட்டப்பெயர் இல்லை அது அந்த பெயர் அறியப்படாத சோழ அரசனின் பெயர்தான் என்று என்னால் ஒரு தெளிவுக்கு வரமுடிந்தது. அதற்கு காரணம் அவன் பெயர் “ராஜராஜன்” என்று அந்த கல்வெட்டில் இருந்தது. இவனுக்கு முன்னமே கொங்கு சோழரில் இரண்டு பேர் “ ராஜராஜன்” என்ற பெயரில் பட்டத்தில் இருந்துள்ளார்கள் என்பதை இங்கு கவனத்தில் கொள்ளவேண்டும்.

நம்பியூர் கல்வெட்டு

சரி அந்த பெயர் தெரியாத அரசனை கண்டுபிடிப்பது நமது இலக்கு இல்லை அதனால் அவர்கள் யார் என்று மீண்டும் ஆராயத் தொடங்கினேன். அப்பொழுது அதே ஊரில் அதே ஆண்டில் இன்னும் இரண்டு கல்வெட்டுக்கள் என் கண்ணில் தென்பட்டது. ஒன்று “வெள்ளாளரில் மேன்மணியரில்” என்றும், மற்றொன்றில் “வெள்ளாளரில் கழஞ்சியரில்” என்றும் இருந்தது. அதைப்பார்த்தவுடன் எனக்குள் இன்னும் அதிக ஆவல் தொற்றிக்கொண்டது. காரணம் பழனி அருகே இருக்கும் கீரனூரில் “வெள்ளாள கழஞ்சியரில் கொங்கிளகோவன்” என்ற பெயர் குறிக்கப்படுகிறது.

ஆக இந்த கழஞ்சியர் மற்றும் மேன்மணியர்களுக்கு கொங்கு சோழர்களுடன் மிக நெருங்கிய தொடர்பு இருந்தது புலப்பட்டது. ஆகையால் இவர்களின் கூட்டபெயர்களை பற்றி ஆராய்வோம் என்று தேடும்போது இந்த கூட்டங்கள் ”இரட்டை சங்கு பால வெள்ளாளர்” என்று குறிக்கப்பட்டு இருந்தது. அதுதென்ன இரட்டை சங்கு என்று தேடும்போது அது இராஜ குலத்துக்குரிய மரியாதைகளில் ஒன்று என்பதையும் பல வரலாற்று ஆய்வாளர்கள் குறிப்பிட்டிருந்தார்கள்.

கிட்டத்தட்ட நெருங்கிவிட்டோம் என்று நினைத்துக்கொண்டு “பால வெள்ளாளர்கள்” யார் என்று தேடினேன். இவர்கள் கொங்கு வெள்ளாளர்களின் உட்பிரிவு என்பதால் இவர்களை பற்றி யாருக்கும் தெரியவில்லை. எந்த வரலாற்று ஆசிரியர்களும் இவர்களைப்பற்றி எழுதவில்லை. ஆகையால் இவர்களைப்பற்றி தெரிந்து கொள்ளவதற்கு மிகவும் கடினமாக இருந்தது.

பால வெள்ளாளார்:-

பால வெள்ளாளர் என்பது கொங்கு வெள்ளாளரின் உட்பிரிவு ஆகும். அதில் கவனிக்கவேண்டியது என்னவென்றால் அந்த பாலவெள்ளாளரில் இரண்டு உட்பிரிவுகள் உள்ளது.

1). ஒற்றை சங்கு பாலவெள்ளாளர்

2). இரட்டை சங்கு பாலவெள்ளாளர்

என்ற இரண்டு பிரிவினர்களும் மற்ற பிரிவினருடன் மண வினை தொடர்பு வைத்துக்கொள்வதில்லை என்பது இங்கு முக்கியமாக கவனிக்கப்படவேண்டிய விசயம். அவர்களிடம் கேட்டால் ஜாதி ஒன்றானலும் ஜனம் வேறு என்று முடித்துக்கொள்கிறார்கள். அப்பொழுது பால வெள்ளாளர்களின் குலகுரு “இருகூர் மருதமலை” ஆதினத்தின் மூலம் வெளியிடப்பட்ட ஒரு புத்தகம் எனது கைக்கு கிடைத்தது.

நாம் எதை தேடுகிறோமோ அது நமது கைக்கு தானாக கிடைக்கும் என்பது போல அந்த புத்தகத்தில் எனக்கு மிகபெரிய குறிப்பு கிடைத்தது. அது என்னவென்றால் “ ஆறு நாடு பெரியபட்டம் “சேவூர் பட்டக்காரரான பாலவெள்ளாள பயிசலிய(பைதலை) கோத்திரத்து ஆறுநாட்டார் இம்முடிப்பட்டம் வணங்காமுடி வீர விக்கிரம கரிகால சோழியாண்டாக்கவுண்டர்” வம்சத்தார் சேவூர் சிந்தாமணிப்பாளையம் என்று இருந்தது.

எனக்கு மிகவும் ஆச்சர்யமாக இருந்தது அந்த ஊர் எனக்கு பக்கத்தில் இருக்கும் ஊர். அதே ஆச்சர்யத்துடன் அந்த ஊருக்கு சென்று அங்கு விசாரித்ததில் இந்த ஊரின் பெரிய தலைக்கட்டு “சக்கரை கவுண்டர்” வீடுதான் என்று கூறி எனக்கு வீட்டை காண்பித்தார்கள். சக்கரவர்த்தியின் சுருக்கமே “சக்கரை” என்பது. நம் இலக்கை அடைந்துவிட்டோம் என்று நினைத்துக்கொண்டு அந்த வீட்டிற்கு சென்றேன். மிக சாதரணமாக ஓட்டுவீட்டில் இன்றுவரை விவசாயம் செய்துவரும் குடும்பமாகவே இருந்தது. அங்குதான் எனக்கு சக்கரை கவுண்டர் பேரன் சிவப்பிரகாஷ் அறிமுகம் ஆனார். அவரின் அறிமுகத்திற்கு பிறகு எனது தேடல் நிறைவடைந்தது. காரணம் அவர்கள்தான் கொங்கு சோழர் என்பதற்கு அவரிடம் பல ஆதாரங்கள் இருந்தது. அந்த ஆதாரங்களை ஒவ்வொன்றாக கிழே பார்ப்போம்.

அந்த ஆதாரங்களை பார்க்கும் முன்பு ஒன்றை தெளிவு படுத்த விரும்புகிறேன். அதாவது வீர சோழன் என்றும் விக்கிரம சோழன் என்றும் மாறி மாறி பட்டமேற்று கொங்கு நாட்டை ஆண்ட கொங்குசோழர்கள் தங்கள் ஆட்சியை இழந்தபிறகு விஜயநகர பேரரசின் கீழ் சிற்றரசராகளாக இவர்கள் வீர விக்கிரம சோழியாண்டார் என்று பட்டமேற்றுக்கொண்டார்கள்.