சுதேசி பானங்கள்

சுதேசி பானம் என்பது நம் நாட்டில் நம் நாட்டவர்களால் தயாரிக்கப்படும் வெளிநாட்டு பானங்கள் அல்ல. தொன்றுதொட்டு நம் மண்ணில் கிடைக்கும் பொருட்கள் கொண்டு நம் மக்களால் தயாரித்து பயன்படுத்தப்பட்டு ஆரோக்கியத்தை மேம்படுத்திய பானங்களே சுதேசி பானங்களாகும். இவை நம் உடல் உறுப்புகளில் தேங்கிய நுண்கழிவுகளைக் கூட வெளியேற்றி, உடலுக்கு குளிர்சியூட்டி, ஜீரணத்தை பெருக்கி, சக்தியளிக்கும் பானங்களாகும். வரும் கோடை காலத்துக்கு குழந்தைகளுக்கும் உறவினர்களுக்கும் பெப்சி, கோலா மற்றும் பாட்டிலில் அடைத்த குளிர்பானங்கள் போன்ற வஸ்துக்களை விடுத்தது நம் வீட்டிலேயே தயாரித்து பயன்படுத்த சில சுதேசி பானங்களை கொடுத்துள்ளோம். குடியானவர்கள் பானங்களை தெரியாதவர்கள் தெரிந்து கொள்க.

பானகம் - நாட்டு சர்க்கரை (கருப்பட்டி பனை வெல்லம்/குண்டு வெல்லம்), வாசனை பொருட்கள் (ஏலக்காய், உணவு கற்பூரம், கிராம்பு, மிளகு), புளிப்புப் பொருட்கள் (எலுமிச்சை, புளி, தயிர்) போன்றவை கலந்து செய்வது பானகமாகும். கொங்கு பகுதியில் பானக்கம் என்பார்கள்.

குளிர்ந்த நீரில் நாட்டு சர்க்கரை (தேவையான அளவு) கலந்து ஏலக்காய், கற்பூரம், கிராம்பு, மிளகு கலப்பது சர்கரோதாக பானக்கம் எனப்படும்.

ஆறு பங்கு சர்க்கரோதக பானக்கத்தோடு ஒரு பங்கு எலுமிச்சை சாறு கலந்தால்  கிடைப்பது நிம்புபல பானக்கம் எனப்படும். இது பானங்களில் மிகச் சிறந்ததாக அறியப்படுகிறது. ஜீரணத்துக்கு மிகவும் ஏற்றதாகும். ராமநவமியில் படைக்கப் பயன்படுவதாகும். துளசி இலை சேர்ப்பதும் உண்டு.

பச்சை மாங்காயை சுடுநீரில் கொதிக்கவைத்து அதை கையால் பிசைந்து கிடைக்கும் சாற்றை சர்கரோதக பானக்கத்துடன் கலந்தால் கிடைப்பது பிரபானக்கமாகும். உடலுக்கு நல்ல வலுவூட்டக் கூடிய இது பீமசேனன் முதல் முதலாக தயாரித்ததாகும்.

பழுத்த புளியுடன் தண்ணீர் விட்டு பிசைந்து சாறு எடுத்து அதனுடன் நாட்டு சர்க்கரை, மிளகு, ஏலக்காய், கற்பூரம் கலந்து புளிப்பு சரியாகும் வரை நீர்விட்டு தயாரிப்பது அம்ளிகாபல பானக்கம் ஆகும். இது வாதத்தை பெருக்கி ஜீரணத்தை தூண்டும். (கொங்கதேசத்தில் பயன்படுத்துவது; பங்குனி உத்திரத்தில் பாதசாரியாக்ளுக்கு வழங்கப்படும்.)

மல்லி இலையை அரைத்து வடிகட்டி எடுத்த சாற்றை சர்கரோத பானக்கத்துடன் சேர்ப்பது தனிய பானக்கமாகும். இது பித்தத்தை தூண்டி ஜீரணத்தை அதிகரிக்கும். (நூல்: போஜன குதூகலம்).

நீராகாரம் - நெல் அரிசிச்சோறு, கம்மஞ்சோறு, சோளசோறு போன்ற தானிய உணவுகள் இரவு மீதியானால் அவற்றில் நீர் ஊற்றி வைத்து, சுமார் எட்டு மணிநேரம் நன்றாக ஊறியபின் அந்த நீரை அதே சோற்றுடன் கரைத்தோ கரைக்காமலோ பயன்படுத்துவது நீராகாரம் எனப்படும். உடனடி சக்தியும், குளிர்ச்சியும் தரும். இதனுடன் நாட்டுப்பசுவின் மோர் கலந்து பருகுவது நம் குடலில் இருக்கும் நுண்ணுயிர் சூழலுக்கு மிகுந்த நன்மை செய்யும்.  அமில-காரத் தன்மையை சீராக்கும். குடல் புண்ணுக்கு மிக நல்லது. நீராகாரத்துடன் சின்ன வெங்காயம் சேர்த்துக் கொள்வது நோயெதிர்ப்பு சக்தியை பெருக்கும். மண் சட்டியில் தயாரித்த சோறும், மண் சட்டியில் ஊறிய நீராகரமும் உயர்ந்தவை. எவ்வளவு சீர்கேட்ட உடலையும் சீரமைக்கக் கூடிய, அஸ்திவாரத்தை பலப்படுத்தக்கூடிய உணவு நீராகாரம். நம் முன்னோர்கள் அன்றாட பயன்படுத்திய உணவு.

மோர் - நாட்டுப்பசும்பாலில் நீர்விட்டு, சுண்ட காய்ச்சி,  ஆறவிட்டு பிறையூற்றி தயிரானதும், விடியற்காலை நீர்விட்டு தயிரயுடைத்து கடைந்து வெண்ணெய் எடுத்த பின்னர், மிகுவது மோர். மோர் உடலின் கழிவுகளை நீக்கக் கூடியது. குளிர்ச்சியூட்டக்கூடியது. சுவைக்காக சிறிது உப்பும், மணத்துக்காக கொத்தமல்லி, கறிவேப்பிலை, சேர்ப்பதும் உண்டு. சிலர் இஞ்சி, ஜீரகம், பச்சை மிளகாயும் சேர்ப்பர்.

பஞ்சாமிர்தம் - நாட்டுப்பசும்பால் (ஐந்து பங்கு), நாட்டுப் பசுவின் தயிர் (நான்கு பங்கு), நாட்டு சர்க்கரை (மூன்று பங்கு), நாட்டுப்பசுவின் நெய் (இரண்டு பங்கு), தேன் (ஒரு பங்கு) கலந்து செய்வது பஞ்சாமிர்தமாகும். இதை ரச பஞ்சாமிர்தம் என்பர். ரச பஞ்சாமிர்தத்துடன் மா, பலா, வாழை போன்ற கனிகளை சேர்த்தால் கிடைப்பது பல பஞ்சாமிர்தமாகும். முருகனுக்கு பிடித்தமானது. பஞ்ச+அமிர்தம் - சகலவித நோய்களையும் விரட்டி உடலுக்கு நல்ல ஊக்கத்தைத் தரக்கூடியதாகும். (நூல்: காமிக ஆகமம்)

கூழ் - கம்பு, ஆரியம் போன்ற தானிய மாவை கைப்பிடி எடுத்து மூன்று தம்ளர் படி நீரில் கரைத்து வேகவைத்து, ஆறியவுடன் குடிப்பது கூழ். மண் சட்டியில் தயாரித்து குளிர்ந்து குடிப்பது நல்லது. இதனுடன் மோர் கலந்தும் பயன்படுத்துவார்கள்.

பழச்சாறுகள் - பழச்சாறு நமது மண்ணில் விளைந்த பழங்களின் சாறு மட்டுமே. பொதுவாக சாறு எடுத்து குடிப்பதை விட பழங்களை அப்படியே நன்றாக மென்று உன்னுவதே சிறந்தது. இருப்பினும் சில நேரங்களில் குடிக்க பானமாகவும் பயன்படுத்துவார்கள். பெரும்பாலும் எலுமிச்சை, கொழுமிச்சை, விளாங்காய், நாவல், மாம்பழம் போன்ற சாறுகள் நம் பகுதியில் அதிகம்.

விளாம்பழ சாறு
("கபித்த ஜம்போ பல சாற பக்ஷிதம்" என்று விநாயகரை போற்றும் பாடலில் வரும் கபித்தம்)

பதநீர் - பனை மற்றும் தென்னையில் இருந்து இறக்குவது. சட்டியில் சுண்ணாம்பு தடவி வைத்தால் பதநீர் கிடைக்கும். இல்லாவிட்டால் புளித்து கள்ளாக மாறிடும். பதநீர் மிக சுவையும், சத்தும் நிறைந்த அற்புத பானம். உடலின் அனைத்து உறுப்புகளுக்கும் சக்தியளிப்பது. குளிர்சியூட்டக்கூடியது. ஒரு முறை பதநீர் குடித்தவர்கள் மீண்டும் குடிக்க வாய்ப்பு கிடைத்தால் தவற விட மாட்டார்கள். அலாதியான சுவையுடைய பதநீரை அடுத்த தலைமுறைக்கு அவசியம் அறிமுகம் செய்ய வேண்டும்.

எல்லா இடத்திலும் கிடைப்பதில்லை. கிடைத்தால் மிக நல்லது.

இளநீர் - தென்னை மரத்தின் முற்றாத காயில் கிடைக்கும் நீர். அமிர்தம் போன்றது. அபிஷேகம், மற்றும் ஏராளமான ஆயுர்வேத பயன்பாடு கொண்டது. குளிர்ச்சியும், அரிதான நுண்ணூட்டச் சத்துக்களும் கொண்டது.