மரபு அருளும் ஆரோக்கியம்-வீடியோ பதிவுடன்

நம் உடலுக்கு தேவையான சத்துக்களை வைட்டமின், புரோட்டின் என ஒரு பத்து பதினைந்து பெயர்களில் அடக்கி விடுகிறார்கள். இந்த சில ஊட்டச்சத்துக்களை மட்டும் பெற்றாலே நாம் நோயின்றி வாழலாம் என்ற பிரம்மையை ஏற்படுத்தியிருக்கிறார்கள்.நிஜத்தில் நம் உடல் இயக்கத்திற்கு ஏராளமான மூலக்கூறுகள் தேவை. என்சைம்கள் என்று சொல்லலாம். உதாரணமாக, நவீன அறிவியல் பார்வையில் தேனை சோதனை செய்தால் அதில் 93% சர்க்கரை மீதி நீர், மற்றும் சில கனிமங்கள் மட்டுமே தெரியும். ஆனால் உண்மையில் தேன் அமிர்தத்துக்கு ஒப்பான பல ஆயிரம் என்சைம்களை உடையது; அவற்றை இந்த நவீன அறிவியலால் கண்டறிய இயலவில்லை.

சரியான வாழ்க்கைமுறை (உணவு, தூக்கம், அன்றாட சரியான வேலை, மன அழுத்தமின்மை, மாசில்லா சூழல்), உணவு உட்கொள்ளும் முறை இருந்தால் வெறும் எளிய உணவுகளின் மூலமே நம் உடல் அதற்குத் தேவையான குறைந்தபட்ச என்சைம்களை உற்பத்தி செய்துகொள்ள இயலும். காரணம் நம் வயிற்றில் பல ஆயிரம் வகையான ஜீரணதிரவங்கள் சுரந்து தனக்குத் தேவையான என்சைம்களை தானே உற்பத்தி செய்துகொள்கின்றன. நவீன அறிவியல் அந்த என்சைம்களில் சில நூறுகளை மட்டுமே இதுவரை கண்டறிந்துள்ளது.

இப்படிப்பட்ட மிக அரிய என்சைம்களையும் நுண்நூட்டச்சத்துக்களையும் நாட்டு வகை/மரபு பழங்கள், செடிகள், மரங்கள், காய்கறிகள் இயற்கையாகவே தன்னுள் வைத்திருந்து கொடுக்கின்றன. நாட்டு வகை/மரபு - என்பது எந்த மண்ணில், எந்த சூழல், சீதோஷ்ண நிலையில், நாமும் நம் முன்னோர்களும் தொன்றுதொட்டு வாழ்கிறோமா அந்த மண். நமக்கு கொங்கதேசம்.நம் மண்ணில் தான் நமக்கேற்றது விளையும்.

இந்த நவீன அறிவியல் மற்றும் நவீன விவசாயம் வந்தபின்னர், நம் கொங்கதேசத்தின் பல நூறு மரங்கள், காய்கனிகள் தங்களது முக்கியத்துவத்தை இழந்துவிட்டன. ஆனால், இந்த உயிர்ச்சூழல் தான் நம் முன்னோர்கள் நோயின்றி நலமாக வாழ வழிவகை செய்தது. பனை, இலந்தை, தேங்காய், நவாப்பழ மரம், வில்வம், சீத்தாப்பழம், கோணப்புளியங்காய், கோவை, வாதனா மரம், இலுப்பை, வன்னி, அரப்பு, ஆவாரம்பூடு, கொழுக்கட்டை புல், வேலா மரம், புங்கன், அத்தி போன்றவை அந்த வரிசையில் சில. மா, வாழை, மாதுளை, அரிசி, கம்பு, வெண்டை, முருங்கை, மீன், ஆடு, கோழி, பசு போன்ற பல காய்கறிகள், மரங்கள், உயிரினங்களில் மற்றும் மூலிகைகளில் மரபணு மாற்றம், வெளிநாட்டுரகங்கள் மற்றும் ஒட்டுரகம் வந்துள்ளன. இவை நமக்கு தேவையானது இல்லாமலும், கெடுதல் செய்யக்கூடியதாகவும் உள்ளன.

நாம் மறந்த, இழந்த மரங்கள், காய்கறிகள், உயிரினங்களை மீட்டு கொண்டுவருவது மீண்டும் நம் கிராமங்களை உயிர்பிக்க அத்யாவசியமான தேவையாகிறது. ஆல், அரசு, இச்சி, அத்தி, வேம்பு, வில்வம் போன்றவை பல நோய்களுக்குத் தீர்வளிக்கும் மூலிகைகளாக மட்டுமின்றி மழையை ஈர்த்துத் தரும் அரிய பணியையும் செய்கின்றன. இன்று மரம் நடுகிறேன் பேர்வழி என்று வெளிநாட்டு மரங்களை கொண்டுவந்து நம் உயிர்சூழலை கெடுக்காமல் நம் மண்ணின் மரங்கள், பயிர்கள், உயிர்களை அறிந்து அவற்றை வளர்த்தெடுப்போம்.